Mauaji ya mfanyabiashara Singida. Jeshi la Polisi kufanya msako mkali.

Kamanda wa Polisi Mkoa wa Singida Kamishina Msaidizi wa Polisi (ACP) Debora Magiligimba akiongea na waandishi wa Habari Ofisini kwake leo asubuhi.

 

Na Sylvester Richard.

Singida.

Jeshi la Polisi Mkoani Singida  linaendesha msako mkali wa kumsaka/kuwasaka watuhumiwa waliofanya mauaji  ya mfanyabiashara ajulikanaye kwa jina la Simon  Charles, (49),  mkazi wa Itungukia Manispaa ya Singida.    

Akiongea na waandishi wa habari ofisini kwake Kamanda wa Polisi Mkoa wa Singida Kamishina Msaidizi wa Polisi (ACP) Debora Magiligimba ameeleza kuwa tukio hilo la mauaji lilitokea siku ya tarehe 20.04.2017 majira ya saa 3:30 usiku huko katika maeneo  ya  Stendi ya zamani, Kata ya Majengo, Tarafa ya Mungumaji, Wilaya na Mkoa wa Singida.

Hata hivyo Kamanda Magiligimba ameeleza kuwa mbinu waliyoitumia watuhumiwa hao ni kujificha pembezoni mwa gari la mfanyabiashara huyo lenye Namba T.483 CJB aina ya Noah  alilokuwa ameliegesha hatua chache toka katika duka lake la madawa ya Binadamu lililopo katika eneo la Stendi ya zamani ambapo alipotaka kupanda gari ili aondoke alipigwa risasi na watuhumiwa hao ambao walitorokea kusikojulikana.

Kamanda amesema kuwa chanzo cha tukio hilo bado hakijajulikana na  uchunguzi wa kina unaendelea ili kubaini nini chanzo hasa na kueleza kuwa   Mwili wa Marehemu ulipelekwa  katika Hospitali ya Mkoa Singida kwa uchunguzi wa Daktari kabla ya kukabidhiwa kwa ndugu kwa hatua za mazishi.

 Magiligimba ametoa wito kwa Wananchi wote wa Mkoa wa Singida kushirikiana na Jeshi la Polisi kwa kutoa taarifa zitakazosaidia kuwakamata watuhumiwa wa tukio hilo na kuwafikisha Mahakamani ili kudhibiti vitendo vya uhalifu kama huo na kuwataka wafanyabiashara kuweka walinzi katika maeneo yao ya biashara ili kujihakikishi usalama katika maeneo yao ya biashara.

Kwa habari, Matangazo, Picha, Maoni na Ushauri. Wasiliana nasi kwa anwani zifuatazo

E - mail  -  sylvestermac87@gmail.com

              -   machibya.richard@yahoo.com

Simu No. - 0768 367 454 / 0652 683 063

 Facebook  Machibya Richard