Watu wawili wafariki dunia kwa kuangukiwa na Mgodi wakiwa wanachimba madini Mkoani Singida, Kaimu Kamanda wa Jeshi la Polisi Mkoani  humo ACP Simon S. Haule  awaonya wachimbaji madini kuacha kuchimba bila kibali.

 Hapo ni Picha ya Kaimu Kamanda wa Jeshi la Polisi Mkoani Singida ACP Simon S. Haule  akiongea na waandishi wa habari Ofisini kwake.

Na Sylvester Richard.

Singida

Watu wawili wamefariki dunia Mkoani Singida wakiwa wanapelekwa Hospitali ya Wilaya ya Iramba kwa matibabu baada ya  kuporomokewa na mgodi wakiwa wanachimba madini ya dhahabu katika mgodi wa Mbuyuni “B”  ulipo katika Kata ya  Mgongo Tarafa ya Shelui. 

Akiongea na waandishi wa habari ofisini kwake Kaimu  ACP Haule ameeleza kuwa tukio hilo lilitokea siku ya tarehe 19.06.2016 majira ya saa 4:00 asubuhi ambapo aliwataja waliofariki dunia kuwa ni pamoja na  Mwidosi  s/o Ramadhani, (44),  na  Michael s/o George, (30), Wote Wanyiramba, Wakulima  na wakazi wa Kijiji cha Mgongo.

Aidha ACP Haule alieleza kuwa Jeshi la Polisi limefanya uchunguzi wa awali na kubaini  kuwa Eneo hilo la machimbo linamilikiwa na Kampuni  inayojihusisha na uchimbaji madini ya BARICK Kampuni ambayo ilimiliki eneo hilo kwaajili ya kufanyia utafiti wa madini mwaka 2006 na mpaka sasa halijaendelezwa  ambapo alitoa wito kwa wananchi kuacha kuchimba madini bila kibali kutoka katika Wizara husika kwani Wizara ndiyo yenye wataalamu ambao wanaweza kupima maeneo na kuruhusu kuendelea na shughuli za uchimbaji.

Kwa upende mwingine ACP Haule alieleza kuwa kuna ujali mbili zimetokea Mkoani humo katika nyakati na maeneo tofauti ambapo ajali ya kwanza ilitokea tarehe 19.06.2016 majira ya saa 9:15 alasiri huko katika Kijiji cha Njilii, Kata , Tarafa na Wilaya ya Manyoni, Mkoani Singida , Barabara kuu ya Singida – Dodoma ajali ambayo ilisababisha kifo na majeruhi ikishirikisha Gari namba T.744 DFL  TOYOTA HARRIER ikitokea Mara kwenda Dar es salaam, ikiendeshwa na Bernad s/o Eprahim,(52) ambapo mtu mmoja aitwaye Musa s/o Michael Mjaluo Miaka Mitatu Mkazi Wa Kitunda alifariki dunia papo hapo na wengine watano kujeruhiwa.

ACP Haule aliwataja majeruhi kuwa ni Bernad s/o Ephrahim Mjaluo Miaka 52 Mfanyabiashara Wa Kitunda Dsm Amepata Jeraha Kwenye Paji La Uso Na Kuvunjika Mkono Wa Kushoto , Queenrose d/o Michael Mzanaki Miaka Sita Mkazi Wa Ukonga Dsm, Amevunjika Mguu Wa Kushoto na Magreth d/o Bernad, Mzanaki, Miaka 29, Mfanyabiashara Wa Dsm Amepata Maumivu Mwili Mzima. Wengine ni Debora d/o Bernad, Mzanaki, Miaka, 43, Mfanyabiashara wa Dsm Amevunjika  Mguu Wa Kushoto na Brayani d/o Idd, 03, Yrs , Mzanaki Wa Ukonga Ameumia Mwili Mzima na kuongeza kuwa majruhi wote wamelazwa katika Hospitali Ya Wilaya Ya Manyoni na hali zao zinaendelea vizuri hali kadhalika  Mwili wa Marehemu umefanyiwa uchunguzi Hospitalini hapo na kukabidhiwa kwa ndugu kwa  ajili ya mazishi. Alitaja Chanzo cha ajali ni mwendo kasi na kutokuwa makini  barabarani ambapo Dereva Bernad s/o Eprahim anashikiliwa na Polisi kwa uchunguzi kabla ya kufikishwa Mahakamani.

Kaimu Kamanda alieleza kuwa ajali ya pili ilitokea tarehe 20.06.2016 majira ya saa 2:20 asubuhi  huko katika Mlima Saranda, barabara kuu ya Manyoni – Dodoma, Kata ya Makutupora, Tarafa ya Kilimatinde, Wilaya ya Manyoni, Mkoa wa Singida ambapo gari namba T.145 AFA/T. 148 AFK SCANIA PULLING  likiwa linaendeshwa na Dereva  asiyefahamika akiwa na shehena ya marobota ya tumbaku akitokea Tabora kwenda Morogoro lilipinduka na kuasababisha kifo cha Utingo wake aitwaye Saidi s/o Mswagara, (33), Mkazi wa Tabora ambaye alifariki dunia papo hapo na kutaja chanzo cha ajali hiyo kuwa ni uzembe wa Dereva kuendesha gari bovu ambalo halikuwa na  breki.

Kuhusiana na ajali hiyo, ACP Haule alisema kuwa hakuna Mtu/Watu wanaoshikiliwa kutokana na Dereva wa Gari kutorokea kusikojulikana baada ya kusababisha ajali hiyo ambapo dereva huyo anatafutwa ili akamatwe na kufikishwa Mhakamani ambapo alitoa wito kwa Madereva na watumiaji wengine wa barabara kuzitumia barabara hizo kwa kuzingatia sheria, kanuni na Taratibu za usalama barabarani.